Kalahati

Laro

Boy, bantayan mo yan, ah!

Sa katirikan ng araw, hindi ko alintana ang pawis na patuloy na sinisipsip ng sandong puti na kinula pa ni inay dalawang araw na ang nakalilipas. Punas dito, punas doon. 

Ang gwapo talaga nya. Pero kailangang mataya ko sya. Ayan, papalapit na sya. Kasabay ng paglipad ng isip ay ang mabilisang pagtakbo ni Itoy patungo sa dulo. Naku, Lagot na!

Yehey!” sigawan ng kabilang grupo. “Panalo ulit. Wala pala kayo e!” sabay-sabay nilang pang-aalaska.

Nakita ko ang panlilisik ng mata ni Beni kasabay ng pag-iling ng iba naming kakampi.

Ang sabi ko, bantayan mo, hindi titigan.” Nakita ko na lamang ang aking sarili na hinahalikan ang maalikabok na kalsadang pinaglalaruan lang namin kanina at ang pagsulpot ng pulang mantsa sa aking pawisang sando.

‘Yan ang bagay sayo, lalamya-lamya ka kasi. Bakla!” narinig ko ang yabag ng kanilang pag-alis, kasabay ng umaalingawngaw nilang tawanan.

May dalawang mukha ang isang laro: ang panalo at ang talo. Ngunit sa murang edad, mas pinili ko munang  tumakbo palayo sa mapanghusgang lipunan at tao at ipanalo ang laban sa mga bisig ng aking ina na tanggap kung sino at ano ako.

Iyon ang huling laro ko ng patintero.

###

——–

 Lubid

Ikaw ang hangganan na pwede kong maabot. Ikaw ang katapusan sa aking simula.”

Hawak ni Mika ang sulat na nagpatanto sa kanya na posible ang pag-ibig na wagas. Na sa kabila ng mapang-matang mundo, may mga bagay na nagtatagal kahit marami ang di sumasang-ayon.

Dalawampu’t-tatlong buwan na siyang umiibig ng patago — masaya, may halong kaba, may kapanabikan. Pag-ibig ang bumuhay sa kanyang kalungkutan. Lalo na sa tuwinang pamimilit sa kanya ng magulang na magsuot ng palda upang magkaroon na ng nobyo. Ngunit sa piling nya, naisip nitong posibleng may tumanggap sa pagkatao nya ng buong-buo. Na kayang iwaksi na isang pagkakamali ang pag-ibig na hinahadlangan ng karamihan.

Tumingin sya sa kisame at kumuha ng upuan.

Ngunit may mga bagay na hindi natin kayang mapagtagumpayan. Ang tulad daw ng pag-ibig natin ay isang kasalanan. Ipapakasal na ko ni Mama at Papa kay Nathan. Patawad, mahal.
-Isa

Maligayang ika-2 anibersaryo sana, mahal,” bulong nito. Bumilang sya ng tatlo at sinabit ang sarili sa lubid na nasa kisame. May mga bagay na nagtatapos upang makapagsimulang muli. At sa kabilang mundo, siguro matatanggap nila na may karapatan din tayong umibig. Dahil tulad nila, tayo ay tao rin.

Ito ang kanyang huling naisip.

###

——

Bahaghari

Wala akong anak na malambot!” kasabay ng pagdampi ng kanyang malakas na kamao sa aking kaliwang pisngi.

Lasing na naman si tatay. Kasalanan ko raw kung bakit tampulan na naman daw sya ng tukso sa inuman.” Ito ang naging sentro ng usapan namin ni Glen habang ginagamot nya ang kulay ubeng pasa sa aking mukha.

Pwedeng-pwede kong labanan si Papa kung gugustuhin ko. Pero hindi ko gagawin dahil mahal ko sya. Kung tingin nya ay sakit ang pagiging iba, mas sakit na maituturing ang hindi pagtanggap sa katulad namin. Kaya’t uunawain ko sya ng paulit-ulit, hanggang maisip nya na kayang gamutin ng pag-ibig ang sakit na gawa-gawa lang ng tao.

“Espesyal ka, Joel. At walang mali sa pagpapakatotoo. Hindi ka isang sakitKaya’t wala kang dapat gamutin sa sarili mo. Kung hindi ka pa kayang tanggapin ng mundo, bukas ang bisig at puso ko para sa’yo,” sabat ni Glen.

Kasabay ng mainit na yakap sa isang lalaking marunong magpakatao, napagtanto ko na sa mundong hati-hati ang opinyon, may isang pananaw na bubuo sa aming pagkatao. Na sa dulo ng labang ito, pag-ibig pa rin ang mananalo. ###

***Ito ay opisyal na lahok sa Saranggola Blog Awards 10 para sa kategoryang Dagli.

Mga Sponsor:

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s